رصد موقع “الشرقية” الإخباري أخطر 10 حيل وخدع جديدة تداولها رواد “السوشيال ميديا” والتي يتم سرقة السيارات بها وهي.
1 – قطعة المعدن
أول ما تدور العربية وتيجي تتحرك بيها تسمع صوت حاجة معدنية مكسورة، والحقيقة بيكون الحرامي قطعة من المعدن أو ماسورة في العربية من الخلف، بحيث تفاجأ بها وتنزل تشوف فيها إيه، ويدخل هو مكانك في غمضة عين ويسرق العربية وهي دايره.
الحل:
متنزلش من العربية تحت أي ظرف من الظروف وأنت سايب المفتاح جواها, لا تقولي هاجيب حاجة من الكشك والعربية قدامي ولا تقولي المسافة قريبة وهاقدر ألحقها، الحرامي بيسرق الكحل من العين …وماتنساش إن دي مهنته وهو محترف فيها.
الأصل في فن قيادة السيارات إنك تلف لفة كاملة حوالين العربية قبل ما تركبها، مش ها تاخد منك 10 ثواني, خلالها هاتكتشف لو فيه حد خبطهالك، أو لو فيه كاوتش نايم, أو لو حد عاملك فيها فخ علشان يسرقك أول ما تتحرك, كمان علشان تتأكد إن مفيش شخص غلبان نايم وراها, أو قطة كانت داخلة عند الكاوتش تتدفى في البرد (معظم القطط المصرية بقت عارفة شغلها أول ما تسمع باب العربية بيتفتح وتسيبهالك من سكات، ولو حسيت بالخطر في حالة نزولك من العربية استمر في السير بيها لأقرب مكان آمن ممكن تنزل تشوف إيه اللي بيحصل (في حالة لو ما عملتش أولاً وثانياً ونسيت, عادي كلنا بننسى).
2 – الورقة المانعة للرؤية
أول ما تيجي تركب العربية, وتتحرك بيها تلاقي ورقة على الزجاج الخلفي مانعة للرؤية، تيجي تنزل من العربية تشيلها تلاقي الحرامي عمل معاك نفس اللي حصل في الحيلة السابقة
الحل
نفس الحلول في الحيلة السابقة.
– حيلة البيض
وانت ماشي بالعربية تفاجأ ببيضة نيئة إترمت على الزجاج الأمامي أو الخلفي، غالباً بتكون معدي تحت كوبري أو فيه منطقة عالية في الطريق، بالطبع إنت هنا مش قدام طفل بيلعب بالحاجات اللي جوة ثلاجة أهله، وبالتأكيد مافيش فرخة هاتطير على ارتفاعات عالية وكمان تبيض وبيضتها تقع فوق الزجاج الأمامي لعربيتك !!!
اللي بيحصل هو إن الحرامي بيكون عامل عصابة، عيل يرمي بيضة من مكان مرتفع على الزجاج الأمامي … تقوم انت تتخض قدام عنصر المفاجأة … وبيكون الحل هو انك تركن على جنب علشان تمسح آثارها “حل سيئ”، وده عز الطلب للحرامي اللي ها يفاجئك علشان يسرق العربية، أو إنك تشغل مياه المساحات علشان تمسحها وانت ماشي “حل أسوأ”، لأن ساعتها الزجاج كله ها يتحول إلى بياض بيض ني والرؤية ها تنعدم.
الحل
استمر في القيادة لحد أقرب مكان آمن , وشيل آثار البيضة باستخدام فوطة جافة الأول بعد كدة صابون على طول … بس الأهم من كدة انك تكون بعيد عن المكان ده تماماً وبعيد عن أي عربية بدأت تتبعك من مكان “قصف العربية بالبيضة” !!!
4- التانك بيخر يا كابتن
وانت ماشي في أمان الله تلاقي واد راكب عجلة أو موتوسيكل يقولك “الحق التانك بيخر يا كابتن”, طبعاً انت تتفزع وتحس إن فيه مصيبة حصلت، وبعدين تنزل جري تشوف فيه إيه … وده عز الطلب بالنسبة للحرامي
الحل
: سيبك من الواد العبيط ده (مع أخذك في الاعتبار إن 20% ممكن يكون كلامه صح … استمر في القيادة …حتى لو التانك بيخر هاينزل قد إيه ؟؟ وهل فعلاً ظهرلك على مؤشر البنزين انه بينقص بسرعة ؟؟ … في كلتا الحالتين استمر في القيادة من غير أي نزول من السيارة تماماً … وابقى ادخل محطة بنزين شوف إيه الحكاية, ده لو كان بيخر فعلاً.
5- حيلة الطفل الرضيع اللي على جنب
ماشي في حالك تلاقي عربية طفل … أو طفل رضيع … أو عيل صغير بيعيط داخل سبت أو كاريكوت أو أي حاجة ممكن يتشال فيها عيل … تركن على جنب (خصوصاً قلب البنات بيبقى حنين) يكون ده عز الطلب بالنسبة للحرامي
الحل
سيب أهل المنطقة هما اللي يتصرفوا … الحالات دي لو كانت صحيحة بتكون حالات إنسانية ولها مساءلة قانونية وأفضل شئ يكون تحت ولاية أمر حد في نفس المنطقة اللي هو مفقود فيها, دا لو كان فعلاً طفل مفقود أو لقيط , أما في معظم الحالات بيكون مجرد فخ علشان الإيقاع بالضحايا.
6- شخص اترمى على ألأرض
وإنت ماشي عادي بتلاقي واحد اترمى على الأرض وعمال يصرخ, (إنت ياعم خبطتني, مش تفتح, انتوا ما عندكوش قلب ولا رحمة , هو اكمني غلبان يعني ماليش ضهر ولا تمن في البلد دي …. إلخ إلخ).
إنت طبعاً بتكون سرحان, لأنه بينقي ضحاياه من الناس السرحانة سواء في موبايل بيتكلم فيه أو في البنت اللطيفة اللي قاعدة جنبه أو أشياء أخرى كتير … بس إنت كذلك متأكد انك ما خبطتهوش (ساعات هو بيروح يخبط نفسه في العربية علشان تسمع صوت خبطته وتتخض) … طالما إنت قدام ربنا واثق من نفسك إنك ما خبطتش حد, (ما تعش بقى جو أنا ما خبطتهوش وهو غرقان في دمه على الأرض وزجاج عربيتك مكسور, احنا بنتكلم على واحد بيتلكك علشان يفتعل معاك خناقة وينزلك من العربية).
الحل
خد بعضك وامشي من سكات من غير قلق, وخليك بارد بشكل مستفز على غير العاده علشان ما يحاولش يغضبك وينزلك من عربيتك تضربه … ولو حصل بقى ونزلت من عربيتك (نسيت وكلنا بننسى) …قول له
تعال على القسم إعملي محضر … ساعتها ها يفلفص منك وأبورجل مسلوخة ده اللي كان مرمي على الأرض دلوقتي ها تشوفه طلع يجري ولا زعيم السنافر !!.
7- الشحات الرزل
واقف في إشارة, جالك شحات , وانت ماديتهوش حاجة , أو اديتله مثلاً نص جنيه … ها يقعد يبرطم ويقول كلام هرتلة, وبعدين يتف عليك أو على العربية (بيتعمد إنها تكون على وشك, آسف لو ده قرف بعض الناس لكن ده إللي بيحصل).
الحل
تعال على نفسك ونضف نفسك وإحذر كل الحذر انك تنزل وراه تعمل أي حاجة …إوع ينزلك من عربيتك خصوصاً انك هاتكون في قمة الغضب وهاتسيب مفاتيح عربيتك في الكونتاكت … (ماينفعش هنا ننسى بالنسبة للناس اللي نسيت في الكام حيلة اللي فاتوا), وحافظ على زجاج عربيتك مغلق قدر الإمكان
8- الموتوسيكل اللي بيخبط في الشنطة
ماشي لا ليك ولا عليك … وفجأة تسمع “طاخ بوم تش” … موتوسيكل خبط عربيتك من من الخلف , هاتلاقي الواد اللي راكب الموتوسيكل زي ماهو مش هايقع ولا هايتعور , وكمان هاتلاقي إن خلفه حد عمال يزعق ويتخانق , متنزلش وتسيب عربيتك وكمان مفاتيحك, نصيحتي ليك ما تنزلش خالص
ليه ؟ أول حاجة خبطة الموتوسيكل من الخلف بتكون مؤثرة في الإكصدام وده أمره سهل .. تاني حاجة المضرور بجد هو اللي كان راكب موتوسيكل … ثالث حاجة إنت لو نزلت من عربيتك بيكون الموضوع عبارة عن عصابة والمرة دي مش بيتسحبوا …المرة دي بيكون بالإكراه وعربيه تانية قدامك بينزل منها ناس يتصرفوا معاك…رابع حاجة ما حدش ها يخبطك من الخلف ويكون هو الصح, القاعدة المرورية بتقول بغض النظر عن طريقة التوقف المفاجئ وأسبابه, القادم من الخلف هو المخطئ في حالة التصادم , يعني مايقعدش يبرطم يقوللك انت اللي وقفت مرة واحدة يا “كابتشن” والكلام الهبل ده.
الحل
خد بعضك وامشي من غير كلام كتير, عيش الجو المصري بتاع الحمدلله جات سليمة واللي ييجي في الريش بقشيش وحمدالله على سلامتك وتتعوض ان شاء الله , إكصدام العربية حتى لو راح بالكامل “وده احتمال مستبعد” أرخص بكتير من تمن العربية بحالها أو الفدية بتاعتها لو هما خاطفينها مؤقتاً
ملحوظة : الحيلة دي ممكن تتنفذ بعربية قديمة, خصوصاً لادا القديمة أو فيات 1300 أو بيجو 504 … حاجة كدة ما تتأثرش بالخبطات وتصليحها كلها على بعضها بـ 3 جنيه. ها تكون في مكان مش محتمل السرعة علشان تنخبط من الخلف خلي المنطق يشتغل.
– البنوتة اللي مستنية الأوتوبيس في حتة مقطوعة
تيجي كدة ماشي في طريق فاضي وفجأة, في حته مفيهاش مساكن ولا بيوت ولا شركات وتلاقي اللي واقفه كده لحالها, قال يعني مستنيه تاكسي أو مواصلة في المكان القاحل ده، طبعاً قلبك الحنين وشهامتك يبدأوا ينقحوا عليك (قال يعني) .. وتركن على جنب و “تترجاها” انك توصلها ..الباقي معروف … هاتترجاها إنها تاخد العربية بس وتسيبك سليم !!.
الحل
ماتركبش حد ماتعرفهوش, وخصوصاً في أوقات الليل أو الأماكن الغير مسكونة, أو في مكان مش منطقي تواجد حد قدامه يقف يتتنى مواصلة وماتقوليش ماهو شكله نضيف وابن ناس (كل الناس ولاد ناس, التعبير ده مش صح أصلاً من الأول) … أو (هي بنت والوقفة كدا خطر عليها) , لأنها هاتكون خطر عليك إنت نفسك بعد كدة !!.
ملحوظة: الحيلة دي مش لسرقة السيارات فقط , دي مستعملة لتهريب المخدرات من الكمائن عن طريق شنطة البنوتة اللطيفة اللي راكبة عربيتك دي !
10- إلحقوني شاب إتحرش بيا
تلاقي واحدة راكبة عربية نص كم, وهي أصلاً ست أو بنت نص كم … وفجأة تلاقيها عمالة تسبل عيونها , وتديك كلاكسات , وتلاغيك … وطبعاً جينات الخيانة تبدأ تشتغل جواك وتلعب الخمر برأسك الأغبر … أول ما تيجي تتجاوب معاها هاتنزلك من عربيتك, وغيرك هايركبها تحت تهديد السلاح !!.
وساعات يكون رد فعلها لما تبدأ تتجاوب معاها انها تستغيث بالـ “مارة” اللي مش بيكونوا فعلاً مارة , بيكونوا جزء من العصابة في المكان الموعود , يتلموا عليك يرنوك علقة علشان عاكست سيدة بريئة ماشية في حالها , آه ياخلبوص !! …وتفوق من العلقة دي على عربيتك ومحفظتك وموبايلك رايحين، بصراحة في الموقف ده إنت تستاهل , علشان كدة مش هاحط حل للحيلة دي !!
